Verkoop van het Wanssumer Staeysche veer aan den heer van Well in 1601

Wellenaar Gérard Peters was oud rentmeester van kasteel Well en oud burgemeester van de gemeente Bergen.

Vervolg van de tekst:

Wy Henrich Schenck scholtis des Ampts Kessel, Gaert Trippen en Vijt Kessels, schepen der dingbanck Wansum doen kondt in craft deses openen besegelten briefs, ende voer yder menligen syn certificerende alles op onseren gedaenen eede dat voer ons in eygener persoenen gecompareert ende erschenen syn Peeter opten Staey ende Heylleken syn huysvrouw als tochtere,. met Jan ende Jenneken ehluyden Peeters voerschreven eenigen sohn ende erve, ende Heyllkens dochter,, beyde in haere ierste ehe geboren, ende hebben vader ende moeder, sohn ende dochter, zemptliche eheluyden met hueren voerbedachten moede, ende rypen raede, een ij der besonder ende alle zampt tho gelijck eenclrechtelicken voer huer ende hueren erven ofte naecommelingen uutgedraegen, beliet ende becant overmits desen, dat sy eheluyden alle zampt vader ende moeder als tochtere, sohn ende dochter als rechte erven ende nacomelingen een rechte, stedige erfbuytinge, ende coop geraempt, gehalden en gedaen hebben met den wolgeboren Wylhelmen van Flodorff vry ende heeren tho Leuth, Well etc. van haere halfdeel des, Wansommers Staeyschen vehrs voer ende tegen een hoefstede en bongarten Geridt saliger opten Staeij thostendig gewesen, gelyck ende woe den bongaert voerscreven der voergemelter heer van Pouwels van Wyckray getransporteert is, vry, loss, ledich, sonder yemandts ytwas daerop te suecken te hebben, furbehalden, oft sonder den heer vanden Lande jaerlix twee boeme daer uut te geven, ende daer beneffens een seeckere somme van penningen denen gerichteliche opgedraegen doer den wolgeboren heeren volmechtiger Johan Boermans als Scholtis tot Well, dyer tyt, daertoe gedenomineert voer ons schepen voerscreven geschehen, ende der voerscreven somma van cooppenninghen sy ehluyden vader ende moeder, sohn ende dochter een yder besonder ende alle zampt eendrectelicken voer hun, hueren erven ende naecomelingen hunnen ten vollen geschiet deget ende al wael daervan betaelt te zyn ende den iersten penninck met den lesten ontfangen te hebben. Derhalven gemelter Peeter ende Heylken, ehluydt als teuchtere, met gueden voerweten Johans ende Jenneken als gerechte erven, oock ehluydt voerscreven voer hun, haeren erven ende nacommelingen een yeder voer sich ende alle zampt eendrechtelicken, gelyck voer ons den Richterbaedt ende schepen voergenoempt in alle beste form ende maniere, als sij met recht ende nae deses lants ende banckgewoenheyt doen connen ende moegen; transportiert hebben ende transportieren midts desen der wolgeboren heeren ende syner ergemaelen zampt yrer erven, ende naecommelingen, haere halfdeel des Wansommers Staeyschen vehrs met alle gerechtigheyt wye datselve ynnen van haeren voeralderen van alder tot alder aencommen ende vader ende bestevader beërft is, niet darvan af noch uutgescheiden, met den furbehalt, dat der wolgeborene heef ofte syne erven ende naecommelingen gemelten Peeter, Heylken, Jan ende Jenneken haere kinder ende kindtskinderen, soe die huysstede op ten Staeij gebruycken ende besitten mochten ende anders niet.... well niet sonder eenighe ergeltenis ende erfahren laeten sonder eenighe contradictie ofte bewerdinghe van yemandt, niet daervan uutgescheiden, soe wes dieselve dye de huysstede voerscreven gebruyckden ende bewoenden oft yemandt van haeren huysgesinne wes sy daer over te doen hebben mochten, ende wat hen daer van node wesen mochte over te doen, ende in alle manieren vry over te fahren laeten, Daerbeneffens oyck dye wijl ynnen wol gemelten heeren halfscheijt van Pouwels van Wyckraey aangeerft, ende nu Peeters ende Janss zampt yren huysvrouwen ende erven gewesen halfdeelen des voorscreven vehrs, mit huijs, hoff ende etlich landt des huijs tho Geisteren jaerlix ses en dertigh stuyvers tho thyns geldende heft, sal des wolgemelter heer ende syne erven, nu vort aen dat half deel, als nemptlich achtyen stuyvers tho thyns desselfs jaerlix costeloes ende schadeloes aen den heeren tho Geisteren sonder eenighe entgeltenis van Peeter ende Jan ofte yren erven verrichten ende soe volgents Peeter ende Jan ofte haere naecommelingen, dat ander half deel oock aen den voergenoemden heeren tho Geisteren betaelen. Noch beneffens ist furbehalten, dat der voergemelter heer, oft sijn erven, sullen Peeteren ende Heylken, als tochteren Jan ende Jenneken als gerechte erven ofte naecommelingen tot yder leninge afnehmen twee stuyvers, het welcke is het vierdendeel van een schattinge tho welcke twe stuyvers voerschreven wy Peeter ende Heylken, Jan ende Jenneken als erven in dat half deel des vehrs leggen ende tot Wansum betaelen, alles sonder eenigh argelist beheltlicken den heeren van den Lande ende eenen yderen syns goeden rechten. In oirconde der waerheyt hebben wy voorscreven schepen gebede onseren voorscreven scholtis dat syn E. ditselve voer ons wolle besegelen overmits wy geenen schependoms segel en gebruycken, hetwelcke ick boven gemelte scholtiss durch bede der voorscreven schepen bekenne geerne gedaen te hebben ende myn gewoenlick segel alhier onder aen desen openen brieff doen hangen. Gegeven inden Jaere ons Heeren duysent ses hondert een, op sinte Andrysdach, des Heyligen Apostels.